أمى ثم أمى .. حب عمرى …  بقلم : عاطف دعبس 

بقلم : عاطف دعبس

” مش عارف لو كنتى لسه معايه كنت عملتلك إيه ؟ وياترى كنت هحس بنفس إحساسى دلوقتى “؟،

” صحيح لما كنتى موجوده بحبك وحنانك ، ماكنتش حاسس قوى ؟ لا طبعا كنت حاسس ، بس كنت بستعبط ،،”

” بس اللى أنا متاكد منه “وجعتى” يوم رحيلك ،لما قالولى خلاص البقيه فى حياتك ،، يومها ياأمى خفق قلبى برعشه غريبه ، وكأن الدم فى عروقى إرتبك ولم يعد يستطيع أن يطمئن ، بس إحساسى لو انت فى حياتى دلوقتى ،،كنت ركعت تحت رجليكى ، وأقولك بحبك ياغاليه ، ياأغلى مافى الدنيا وأحب مافى حياتى كلها ، عارفه ياامى ، أنا حاسس إنك حسانى دلوقتى ، لان نظرتك بفحمت شفتيكى وانت بتدعيلى لسه شايفها قدامى ، أخر مره كنا مع بعض فيها ،،كنت بوصلك للحج وانتى بصالى من شرفة الاتوبيس وبتقوليلى ياله خد اخوك وإمشوا ،، وقتها كنت عاوز أقولك ، انت عارفه ياأمى انى بحبك بس كنت بدلع عليكى ، سامحينى ، لكن خوفى من نزول دمعتك المحبوسه منعنى ، بس والله قلت فى سرى ، وحاجه غريبه قالتلى انى مش هشوفك تانى ، وانك هتموتى بعد ركعتين الوداع فى جبل عرفات، وهتدفنى هناك، زى ماكنت عاوزه ، قالولى انك كنتى بتغنى ، حب الرسول يابا ، وبتدعيلى وإبنى اللى كان تعبان ، هو بقى كويس وناجح ببركة دعاكى ، وأنا كمان الحمد لله ، ربنا يرحمك ياأمى ويجعل مثواك الجنه ، ويارب كل من له ام لسه نفسها فى الدنيا يقوم حالا يقولها بحبك ، بحبك وعارف قيمتك وان الجنه تحت أقدامك ياأمى ياأجمل وأحن أم فى الدنيا”

هذا ما أحفظه لأمى فى قلبك ،، كلنا نحتفظ بقلب الام بجانب قلبنا ،، هى روح الله فيك ،، هى رحمة الله على الارض ،، لو أدركت أمك فقبل رأسها كل لحظة ،، ولو كانت أدركتها الدنيا فإقرأ لها الفاتحة ،، وصلها فى رحمها ،،ستشعر انك حنان يمشى على الارض لانها ستبتسم لك من الجنة وتدعوا لك بالصحة والستر ولسان حالها يهمس من جنبات السحب وصفاء السماء ،، روح ياإبنى أو يابنتى ،، ” ربنا يبعد عنك كل شر ويوعدك بولاد الحلال “