دخول المدارس … بقلم : مريم ماهر

دخول المدارس

بقلم : مريم ماهر

-احمد الدراسه خلاص هتبدأ يا حبيبي
=ايوه يعني عايزه ايه؟
-اصل آسر ويارا داخلين 4 ابتدائي وادم داخل 2 هندسه …الولاد بيكبروا بقي وليهم طلبات يا حبيبي
=طلبات ايه اللي عيال ف ابتدائي هيحتاجوها غير اللوليتا وانهم يناموا من غير ما حد يضايقهم ؟
-لا ماهي دي مش طلباتهم طبعا …دي طلبات المدرسة السبلايز ليست يا حبيبي
=هي المدرسه هتحتاج ايه غير كراستين وقلمين وجلادين وخلاص يعني ايه لازمتها يعملوا ورقه عشان الطلبات دي يعني وريني كده
-كراستين وقلمين ؟ ده انت هتتصدم صدمه عمرك ، اتفضل يا حبيبي
=نهارك اسود من الاسود الغامق بدرجتين …جايبالي ورقه اكبر من ورقة الجرايد وتقوليلي طلبات مدارس؟ هو انا مدخلهم هارفارد؟ خلينا نشوف هما عايزين ايه 16 جلاد بالوانهم ، اسكتشات رسم كبيره و4 علب الوان عشان فان جوخ ميقولش علينا حاجه ، 8 علب صلصال عشان يبنوا بيهم الاهرامات من اول وجديد طبعا ، 20 قلم رصاص ، وايبس ،معطر جو….. بقي انا حتة عيلين زي دي يبيعوني اعضائي عشان ادخلهم المدرسه؟ طب انا موافق ع كل الطلبات دي مقابل اني اروح معاهم كل يوم واستخدم كل الحاجات دي مينقصوش قلم
-اهدي بس يا حبيبي انت طبعا مش هتجيب كل الحاجات دي
=انا قولت برضه انهم بيبالغوا …طمنتيني
-بيبالغوا ايه بس…انا اقصد انت مش هتجيب كل الحاجات دي بس لسه في الباج واللانش بوكس واللانش باج وفلوس الباص وفلوس تبرع وفلوس اللي شافهم ولا صلاش ع النبي وفلو…….احمد انت بتترعش ليه؟
*يقع احمد ف الارض حسرة ع شبابه اللي هيضيع في جمع فلوس السبلايز ليست عشان ولاده يطلعوا احمد زويل *
* في المستشفي *
الدكتور: عنده بوادر جلطه وانهيار عصبي …يفضل ميتعرضش لاي انفعالات
-الحمدلله ع سلامتك ياحبيبي ….انا جايه اتطمن عليك وآدم كمان عايز يشوفك
=خليه يدخل ده حبيبي ده ملوش طلبات
*الحمدلله ع سلامتك يا بابا…معلش بس استاذنك عايز 3000 جنيه وكليتك عشان اجيب لوح واسكتشات والالوان والاقلام والسنون و…..بابا؟
*النبض بيقف *
*طب بلاش السنون؟