الكاتب الصحفى عاطف دعبس يكتب ” سيبوا الناس فى حالها”

الكاتب الصحفى عاطف دعبس يكتب ” سيبوا الناس فى حالها”

لعله سؤال أصبح له منطق ولكن لن تكون له إجابة مقنعه،، والسؤال هو،، ليه الناس بتاكل فى بعضها بالحق والباطل؟ وبشراهه ولذاذه بسخافه كده ؟؟
ياريت نرتقى ونسيب كل واحد فى حاله وكل واحد يبص لنفسه أولا قبل أن يفتش فى جيوب غيره ! فقد يجد ما يجعله مكسوفا خاسرا طول عمره، وكان يعتقد أنه خال من العيوب والنواقص!!
وربنا عالم ومطلع ومفيش حد مش عارف نفسه على إيه، وبعدين الكلام والتلقيح والغمز واللمز، والتلويش على الجميع،، لا هيزود ولا هيأثر على الحقيقة الناصعه،، لكنه هيشوه ناس وهيسيئ لهم وأهلهم، وهم أبرياء ولا ذنب لهم وكفاهم ما أصابهم فى عزيز لديهم
سيبوا الناس فى حالها، وإنسوا حقدكم وغلكم وتنافسكم على أشياء ومناصب ومكاسب تخسركم إنسانيتكم وأخلاقكم وتذكروا أن الإساءة ستطولكم كما طالت غيركم، فى يوم من الأيام، وتلك طبيعة الأشياء
وفكر فى كلمتك هتعمل إيه وهتأثر إزاى، وإيه محلها من الإعراب ولا تتطوع بالنقص والسخف والكذب على الله وضع نفسك مكان من تريد التحفيل عليه
وتذكر أننا كلنا عندنا إللى ربنا عالم به وساترها معانا وإوعى تفتكر إنك ملاك بجناحين، مفيش ملائكة على الأرض، ياحبيبى
والعقيدة السهله والمؤكده بتقول – يوم لك ويوم عليك وداين تدان- وكما قطعت وحرقت ستقطع وهتولع بنار الدنيا قبل نار الأخره لأن الله حق وعدل
لا تكونوا ملكيين أكثر من الملك ولا قضاة وجلادين فى ذات نفس الوقت،
ويامسهل