Anbaa Aldelta انباء الدلتا
عادل عبدالرحمن يكتب:
النائب ..
صوت لضمير الأمة !!!
*******
مر عام بالتمام والكمال علي حلف القَسَم للسادة نواب الشعب بالمجلس الموقر ( حلف قَسَم اليمين الدستوري .. أقسم بالله العظيم أن اكون مخلصاً للوطن وأن أُرَاعي مصالح الشعب الي ……نهاية القسم ).
طيب مين من السادة النواب اللي هيقدم لنا من سجل ودفتر التحركات بأمانة المجلس كل كبيرة وصغيرة من نشاطه داخل المجلس من مشاركاته في اعمال المجلس سواء طلبات إحاطه او إستجوابات قدمها او مشاركة في اللجان او تعديل قانون او تقديم مشروع قانون دة علي المستوي التشريعي.
طيب اي رصد لمخالفات مؤسسات او فساد مسئول اوتدني مستوي مؤسسه من المؤسسات او الهيئات او المديريات التي تقدم خدمة للمواطنيين !!! ده علي مستوي الرقابي .
نجي للأهم والأعم والأشمل فيه حد من النواب الأفاضل يقدم لأبناء دائرته كشف حساب مسلسل طوال عام كامل بالخدمات التي قدمها للمواطن من مشروعات خدمية عامة او حتي خدمات خاصة بمؤسسات او شركات او خدمة تتلمس حياة البسطاء من المواطنيين ..
لن اقول أتحدي ولكن البينه علي من ادعي والخدمات الملموسة علي من يجحد فضل نائب ؟؟؟؟!!!!
يعني اي نائب قدم خدمات طوال العام المنقضي وبعد نهاية الفصل التشريعي الاول وبداية فصل تشريعي ثاني !!!
ياريت حالة الثبات العميق بلاش نقول النوم العميق اللي اصاب الكثير من النواب إلا من رحم ربي .
يراعوا ربنا في اليمين والقسم اللي حلفه امام الله اولا ثم الشعب….
في أن يراعي مصالح الشعب !!!
ياريت نبطل متاجرة بالمبادرة الرئاسية حياة كريمة أحد البرامج التي اطلقها فخامة الرئيس منفرداً للنهوض بمستوي الحياة المعيشية للقري الاكثر إحتياجاً و فقراً في ربوع مصر ، بجميع المشروعات التي تتعلق بالبنية التحتية والمؤسسات الخدمية . ياريت حضرات السادة النواب يقدموا خدمات حقيقة وملموسة للشعب من ميزانيات الخطط العاجلة او الاستثمارية للمشاكل الملحة والتي لا تنتظر الدخول في جدول مشروع حياة كريمة ولا تتحمل عامل الوقت !!!
السادة الافاضل النواب الأكارم ماذا قدمتم حتي يحفظ ماء وجوهكم امام ناس حَملتكُم علي الاعناق لكي تصل الي هذه المكانة والجلوس علي كرسي البرلمان ؟؟؟
هل هناك تواجد حقيقي علي أرض الواقع بالشارع للسادة النواب ؟؟
هل قدم السادة النواب ما يمليه عليهم ضمائرهم امام الله ثم امام المواطن ؟؟؟
اين الخدمات العامة يا سادة ؟؟؟
دعوكم من التمسح في مشروع حياة كريمة والمتاجرة بها ، الحق الاصيل في الملكيه الفكرية والتنفيذية لفخامة الرئيس هو من دشن ونفذ وفعل مشروع حياة كريمة للشعب المصري .
ياريت نلتفت لملفات اخري تتعلق بحياة المواطن الكادح البسيط مما يتعلق بالامور الحياتية من غلاء اسعار ومعيشه وفساد مالي واداري بالمؤسسات .
بلاش دعم القيادات علي العَمَال والبَطَال فين المحاسبة الرقابية ؟؟
نفسي اشوف نواب بتحاسب مسئول مش بتتمسح في رضاه بالحُب علشان تأشيرة مُسَيَسه لا تنفع صاحبها واسمها تأشيرة!!!
نفسي نواب تُسَأل المحافظين مش تقعد تنتظر بالساعه علشان تدخل لمسئول !!!
نفسي اشوف نائب في استجواب ناري يتشال فيه وزير ، نفسي اشوف ممتاز نصار وعلوي حافظ وفكري الجزار وحجي وعواره والبدرشيني وكمال احمد و أبو العز الحريري والبدري فرغلي فطاحل المعارضة الناضجة .
وياليت كل البرلمان ضياء الدين داود !!
ولسه بحلم بيوم اشوف فيه نواب تعمل للغلابه والبسطاء وللناس اللي شاليتهم علي اعناقهم ووصولوهم للبرلمان .
نفسي اشوف نائب نزل الشارع وسمع الناس ومشاكلهم وحاسب المقصر والمهمل والمرتشي والفاسد !!! نفسي اشوف نائب بمعني كلمة نائب عن الشعب اللي انتخبه ويكون ضمير للامه وحاسس بالهموم اللي بعانيها الغلبان والبسطاء اللي عايشين رزق يوم بيوم .
نفسي اشوف نواب يعيدوا كرامة المعلم بتوفير حياة كريمة ومرتب كويس اونواب تناقش وتقر وتحل مشكلة حصول المعلم مرتبه علي اساسي 2014…
ولسه بأحلم بيوم اشوف الحلم حقيقه نواب تحمل آلام ومشاكل الناس علي قدر حلف يمين امام الله وامام المجلس الموقر . إلا من رحم ربي فهناك نواب تراعي ربنا في الناس وتعمل قدر استطاعتها وفق الواقع والمأمول .
لنا الله ولكم الضمير !!
إستَقيِمُوا يَرحَمكُم !! الله .
